- 708 -

1447. Febr. 26. Auras.

Conrad der Weisse von gotis gnadin herczog inn Slezie vnd herre zur Olsen, Wartennberg etc.
Vnsire gunsth zuuor vnd allis guth. Ersamen vnd weise, gute gonner. So ir denne wol wisset, wie vnsire liebe swestir fraw Elizabeth herczogynne zu Legnicz mit iren vndirthanen an eyme vnd wir mit den vnsern am andern teile vmbe alle scholdungen vnd czwetrachte vorricht sinth vnd in suliche rechtunge auch die wultuchtigen Hanns Cziris vnd Hanns Zeckiwicz geteidinget sinth, vnd so ir denne Hanns czwissen allir sachin vor vns vorwost habth der sachin als er geczegin warth vmbe dy muncze, betin wir euch in besunderm fleisse, ir wullit dem obgenanten Hanns Czirissen ewern offin brieff gebin der vorwissunge vmbe eyne solichen willen, ap er von ymanden angefertiget wurde vmbe suliche sachen, das er sich mit sulichem ewerm brieffe dokegin mochte geschotczin, das welden wir vmbe euch vorschulden. Geben zu Awras am suntage Inuocauit me dominus anno domini MCCCCXLVII°.

Rückaufschrift: Den ersamen, wolweisen burgermeister vnd rathmannen zu Legnicz, vnsern gutin gunnern.

Orig. Kgl. Bibl. z. Berl. Ms. Boruss. f. 567. No. 69.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866